|
“Uia mai koia, whakahuatia ake ko wai te whare nei e, Ko TĀIKI E! Ko TĀIKI E!” Nō te wiki kua taha ake, whakatōpū atu ai ngā uri o te hōtaka Rakahinonga o Te Whare Angitu, ki te take o Titirangi, i ngā manaakitanga o Te Poho o Rawiri i Tūranganui-a-Kiwa. He wānanga tuatahi, motuhake nei, mō tēnei hōtaka. Ko te aronga o teneki wānanga he ruku ki ngā mahi whakatū pakihi otirā, ngā mahi whakarite i tētahi rawa hei whakatairanga. E rere tonu nei ngā mihi ki a Matua Cain Kerehoma me tōna ohu o Tāiki E! I tō rātou poipoi i ngā uri ki roto i ēnei mahi. I tīmata ake tēnei wānanga ki ngā mahi ohia manomano. Ko tā ngā uri he whakaaro ake ki ngā mea e whakararu ana i ā tātou marae, ā, he aha hoki tētahi rongoā e whakatika i aua raru, ā, i roto i ngā rā e toru, i whai waahi ngā uri ki te hanga i tētahi rawa e whai hua ai pea ngā raru o te marae. He nui ngā mātauranga me ngā pūkenga i ākona ki tēnei o ngā wānanga, ā, e whakamiharo katoa ana ngā uri ki ēnei wheako hei ahunga whakamua mō ā rātou ake pakihi ka huraina ki Te Pūtahi Nui o Ngā Kura ā Iwi o Aotearoa. Ko te aronga mā ngā uri, tae noa ki Te Pūtahi Nui, he whakamātau, he whakamahi, i ngā wheako katoa o te wānanga tuatahi, hei ara tautoko i te hanganga o ā rātou pakihi, kia eke hoki ki te tihi o angitu! Nā Matiu Wiki - Kaiarahi Rakahinonga Ngā Kura ā Iwi o Aotearoa 
0 Comments
I te 9-10 o Maehe i noho tahi ai ngā Kaiako a Ngā Kura ā Iwi o Aotearoa me ngā Kura Kaupapa Māori Aho Matua ki te wānanga i te ara Kete Manarua ki ngā Paerewa Tautokorua. Waimārie mātou i ngā pūkenga, arā a Pāpā Phil Heeney o Te Rūnanganui o Ngā Kura Kaupapa Māori rāua ko Koka Marcia Pohatu-Brown nō TKKM o Ngā Uri a Māui. Nā rāua i whakamārama te ara i whāia e ngā uri o TKKM o Ngā Uri a Māuri kia whakatutukihia ngā paerewa tautokorua ki te Kete Manarua. He māmā, he mārama hoki te ara i whakaritehia - tuatahi me tīmata ki tētehi pūāhua rarata ki ngā uri, katahi ka whai whakaaro mō ētehi wheako hāngai ki taua kaupapa, nā wai rā tirohia ngā tū ariā pāngarau e tareka ana ki te toro ki aua wheako. Ko te akoranga nui kia kaua e timata ki te Pāngarau, whakauru te Pāngarau ki ngā horopaki taunga kē ki ngā uri. Nō muri mai i ēnei kōrero i tū mai i tēnā kaiako, i tēnā kaiako kia whakaatu i a rātou mahi hei koha ki te wānanga. Kāore he painga tua atu i ngā waewae kai pakaiaka! Ko te whakaaro ia whai muri i te whakataetae Waka Ama ā-Motu ka whakarite a Sophie i tētehi hui ā-ipurangi - kia whakaatu i ngā tū mahi i taka mai i te hui. Kāti, me mihi ka tika ki o tātou tuākana nō ngā Kura Aho Matua me o rātou ngākau tūwhera, mākohakoha hoki. Kua roa rātou e para tēnei huarahi hei painga mō ā tātou uri. Nā Sophie Tukukino - Pou Whanake Ngā Kura ā Iwi o Aotearoa  Kei tōku reo auraki mai rā, waihape mai rā Ki tōku poho, ki tōku ngākau, ki tōku arero, ki tōku katoa Kia ora tonu ai koe i ngā tau tini, tau mano Mō te ake, ake haere ake nei. Hei! I tau atu te maha o ngā uri me ō rātau kaiako ki Ngā Taiatea Wharekura i te 13 ki te 16 o Maehe. Ā, kia rumakihia ki te whānuitanga, ki te hōhonutanga me te wairuatanga o te reo me ōna tikanga. Tēnā rā koutou e ngā toki, e ngā mātanga o te ao Māori, o te ao mātauranga. I whakahokia mai ai te taonga ki te mata o te arero, ki te ngākau o te uri:
E mihi kau ana i runga o ngā manaakitanga. Nā Kimiora Webster - Kaihautū Tukuihotanga Ngā Kura ā Iwi o Aotearoa  |
