Toi te tangata o te motu, Toi Arikikura ki te whenua, tau ana!
I tae atu ngā Uri Taihine & Taitama nō ngā kura e ono ki roto o Ngāti Awa, ki te marae o Pupuaruhe mō te kaupapa whutupōro arā ko Toiarikikura. He āheinga motuhake tēnei kia uru katoa ai rātou ki roto i te BOP Youth Deveopment Cup i tū ki roto o Whakatāne i ngā rangi tata nei. I ngā rangi o mua i te tōnamana i whai wā rātou ki te noho tahi, ki te whakangungu i ō rātou pūkenga whutupōro, te whakahoahoa ki ngā Uri nō kura kē me te akoako i ngā mahere tākaro ā tīma. Mihinui ki ngā kaikōrero i tae mai ki te tautoko i ngā tīma - ko Matua Paul Tietjens, ko Kate Henwood, ko Pounamu McGarvey tēnā! Mihi hoki ki ngā kaiako i whakaaetia kia whakahaere ēnei tīma. Ko Matua Autahi Brock (Te Wharekura o Maniapoto) rāua ko Matua Arama Cooper (Te Pā o Rākaihautū) ngā kaiwhakahaere o te tīma taitama. Ko Whaea Suzanne Mackie (Te Pā o Rākaihautū) te kaiāwhina. Ko Matua Richard McGarvey rāua ko Matua Maui Teepa (Te Wharekura o Ruatoki) ngā kaiwhakahaere o te tīma taihine. Ko Whaea Sarah Tihirau (Te Kura Mana Māori o Whangaparaoa) te kaiāwhina. Ko ngā Uri i tae mai ki te kaupapa nei, nō ēnei kura:
E whā ngā kēmu i roto i te rua rā, i eke katoa rātou ki ngā taumata o angitu, i kitea rawatia ngā pūkenga i roto i ngā tīma taihine me ngā taitama. Kei whea mai te kaupapa, kei whea mai te kounga o ngā kaitākaro! Nā Hannah Simmonds - Pou Angitu Ngā Kura ā Iwi o Aotearoa
0 Comments
I te 06-07 o Hune ka tū te wānanga o Oranga Tumuaki Oranga Kura ki Te Kura o Hīrangi, ki Tūrangi, ki roto o Ngāti Tūwharetoa. Ko Oranga Tumuaki Oranga Kura tētahi wānanga motuhake hei tautoko, hei whakakotahi, hei whakangūngū hoki i ngā tumuaki o Ngā Kura ā Iwi o Aotearoa.
Kāore e ārikarika ngā mihi ki ngā pūkōrero i tū ki te takoha i ētahi whakaaro rangatira hei whakakipakipa i ngā tumuaki. Ka mihi rā ki te wahine toa, ki a Annette Sykes, mōnā ētahi kōrero rangatira i whakatakoto mō te hītori o ētahi o ngā kaupapa mana motuhake o te motu me ana kōrero whakahau i ngā tumuaki kia kaha tonu ki te takahi i te huarahi hei oranga mō ā tātou uri. He mīharo ngā kōrero a te pae tumuaki i kōrero mō te oranga. Nā rātou ētahi whakaaro i tuku hei āwhina i ngā tumuaki ki te tiaki i a rātou anō i roto i ngā mahi. E mihi ana ki te pae nei, ki a Hare Rua nō Te Kura Kaupapa Māori o Hōani Waititi, ki a Michelle Treadaway-Ohia nō Ngā Taiātea Wharekura, ki a Heywood Kuka nō Te Wharekura o Mauao, ki a Tanira Cooper nō Te Kura ā Iwi o Whakatupuranga Rua Mano. Tēnā koutou katoa. I te ahiahi o te Taite ka peka atu ki ētahi o ngā wāhi whakahirahira o te takiwā, ki Ōpōtaka, ki Pūkawa hoki, ki reira whakarongo ake ai ki ngā kōrero tuku iho o ēnei wāhi whakahirahira o Ngāti Tūwharetoa. Ka nui te mihi o te ngākau ki ngā rangatira o Ngāti Tūwharetoa nā rātou ngā kōrero i tuku hei taonga pupuri mā mātou. I te pō o te Taite ka kai ngā tumuaki ki te mahanatanga o Tongariro Lodge, ā, ki reira ka waimaria te whakarongo atu ki a Te Rangi Hemi rāua ko Henarata Ham e kōrero ana mō ā rāua noho roa ki te tūranga o te tumuaki, ā, ki ā rāua whakaritenga mō te wehe i te tūranga ā tōna wā. Kāore e ārikarika ngā mihi ki ēnei tino pou o te kaupapa kua roa nei e hautū kura ana. Tēnā rawa atu kōrua. Ao ake i te rā, ka tīmata te rangi tuarua o te wānanga. Ko te kaikōrero tuatahi ko Ruita Taiapa. He mātanga a Ruita mō Te Reo Matatini, ā, koia te kaupapa i kawehia e ia ki te wānanga o Oranga Tumuaki Oranga Kura. He nui te māramatanga i hua ake i tēnei wāhanga o te wānanga mō tēnei kaupapa nui, arā, mō Te Reo Matatini. Kei runga noa atu ngā mahi a Ruita! Ka nui te mihi. Ko te kaupapa tuarua o te Paraire ko te āta wānanga i ngā āhuatanga o te Uri Whai Mana Motuhake. Ko te pātai nui, he aha pū ngā āhuatanga e tika ana kia kitea i roto i te uri hei tana wehenga i te kura? He aha ō tātou tūmanako mō ā tātou uri? Nā tō tātou Pou Kōkiri, nā Watson Ohia taua wāhanga i arataki ki tētahi tukunga motuhake. E mihi nui ana ki ngā whakaaro katoa i puta ake i tēnei wāhanga o te rā. Ka mau te wehi! Hei whakakapi ake, e kore noa ngā mihi e mimiti noa ki a Henarata, ōtira ki te whānau whānui o Te Kura o Hīrangi mō rātou i kaha manaaki mai i te wānanga. Ka ora kaha rawa atu te kaupapa i te nui o ngā manaakitanga i rangona i te roanga o te wānanga. Kei aku rangatira, tēnā rawa atu koutou katoa. Kāti ake, ka tū te wānanga tuarua o Oranga Tumuaki Oranga Kura hei te marama o Nōema. Nō reira hei te wā titoki e tai mā. Kia manaakita nuitia koutou, ōtirā tātou katoa e te wāhi ngaro. Tēnā koutou katoa. Nā Julian Rolleston - Pou Arataki Ngā Kura ā Iwi o Aotearoa Nō te 23 o Mei ka tū te wānanga tuatahi o Oranga Pou Ārahi ki Tāmaki Makaurau. He tuatahitanga taua wānanga. He wānanga motuhake hei tautoko, hei whakangūngū i ngā pou ārahi, arā i ngā heamana o ngā poumarumaru o ngā kura.
Ka nui te mihi ki ēnei pou ārahi i tae atu ki te wānanga nei:
Ahakoa te tokoiti, inā kē te nui o ngā hua i puta ake i te wānanga nei. I wānanga ngā Pou Ārahi i ngā āhuatanga e hāngai pū ana ki ngā mahi, ngā kawenga, me ngā haepapa o te tūranga. I kaha kōrerotia e ngā Pou Ārahi te pai o te noho tahi ki ētahi atu Pou Ārahi ki te wānanga, ki te kōrero tahi, ki te tuari whēako, hei akoranga anō mā rātou, hei oranga hoki mō rātou. Ākuni pea ka whakaturia tētahi atu wānanga Pou Ārahi kia pai ai te manaaki i te nuinga, nā reira, kia mataara ake ki ngā pānui mō tēnei kaupapa. Oranga Pou Ārahi ka ea, ka tau! Nā Julian Rolleston - Pou Arataki Ngā Kura ā Iwi o Aotearoa |