|
Ko te ihu kei Maketu, takoto rawa atu te kei ki te pūtake o Tongariro, ko Te Arawa te waka, ko Ngongotaha te maunga, ko Te Motu Tapu a Tinirau te motu, ko Te Rotorua-Nui-a-Kahumatamomoe te kōroto moana. Ko te tū kōtahi o ngā ira ki runga i a Papatūānuku, ki a Rangi, ki a Papa ki te whenua. Tū ira nuku, tū ira rangi, ki te whei ao, ki te ao marama - haumi e, hui e, taiki e! I tū te kaupapa o Tūiranuku ki roto o Te Arawa waka i tērā wiki, he tōnamana whutupōro takiwhitu mō ngā Uri i raro iho i te 15 tau. E waru ngā tīma taitama, e toru ngā tīma taihine i tae atu ki te whīra o Rotorua Stadium i taua rā. Ahakoa te marangai i tae haumaru atu ngā tīma ki te whakatutuki i te kaupapa. I tino kite atu i te kounga o ngā kaitākaro nō ngā kura katoa, i rongo i te wairua harikoa i waenganui i ngā tīma me te ngākau whakaute o ngā kaitākaro katoa. Kua toru tau tēnei kaupapa e whakahaerehia ana e Te Whare Angitu, mō ngā Uri e ngākaunui ana ki te kēmu whutupōro me te whakakotahi i ngā kura ā-iwi o te motu. E mihi nui ana ki tō mātou kaitautoko pūtea, arā ki a One Foundation, waimaria mātou i tō koutou whakaaronui mai ki ngā kaupapa katoa a Te Whare Angitu. Ki a koutou hoki, ki a Local Gecko Productions, ngā kaipāpaoho, ki a Rotorua Stadium anō hoki, e kore ngā mihi e mimiti. Kei te YouTube ngā kēmu e iri ana, tēnā tomo atu! Nā Hannah Simmonds - Pou Angitu Ngā Kura ā Iwi o Aotearoa 
0 Comments
Huihuia mai rā ngā tumuaki o Ngā Kura ā Iwi o Aotearoa ki runga o Waikato, ki Kirikiriroa, i te 14-15 o Nōema, i reira wānanga tahi ai i ngā āhuatanga o te ao tumuaki. Heoi, ko te kaupapa tuatahi o taua Taite, ko te tautoko i te hīkoi mō te Tiriti i tū ki ngā rori o Kirikiriroa o taua ata. Kāore i kō atu, kāore i kō mai i tētahi kaupapa pērā hei mahi timatanga mō te wānanga Oranga Tumuaki Oranga Kura! Toitū te mana motuhake o te iwi Māori! Toitū te Tiriti! Mutu kau ana te hīkoi, ka hoki ngā tumuaki ki te hōtērā, i reira tīmata ai ngā mahi wānanga. Ka nui te mihi ki a Haani Huata-Allan, nānā te wānanga o te ahiahi i whakahaere. Ko tana kaupapa, ko te whakaako i ngā āhuatanga o te Tetra Map. He rauemi tēnā hei āwhina i te tangata kia hōhonu ake tōna mārama ki a ia anō, kia hōhonu ake hoki tana mārama ki tangata kē atu. Nā reira he tino taonga te rauemi nei hei āwhina i te tumuaki i roto i ana mahi hei kaihautū. I te ahiahi o te Taite, i whakahaerehia ētahi wero, ētahi mahi whakataetae i waenga nui i ngā tumuaki.Ka pakaru katoa te katakata, ā, ka rongo i te wairua pārekareka e rere ana i waenganui i ngā tumuaki. Ka mau te wehi! I te rā tuarua o te wānanga, ka wānangahia ngā āhuatanga o te Tohu Pī Rere, ā, ka noho hoki ngā tumuaki ki te whakarongo ki ngā kōrero mō ngā kaupapa nui ka kōkirihia e NKAI hei tautoko i ngā kura hei te tau 2025 e tū mai nei. I te ahiahi o te Paraire, i pōhiritia ngā kura hou ki te kaupapa o NKAI. Ko ngā kura hou i uru mai ki te kaupapa i tēnei tau ko:
Nau mai, haere mai, nau mai piri mai ki ēnei kura hou! Ināianei, kua 51 ngā kura o NKAI! Hara mai tētahi āhua! Kāti ake, hei te 13-14 o Pēpuere, tu ai te wānanga Oranga Tumuaki, Oranga Kura tuatahi mō te tau 2025. Kāre e roa, ka puta ngā whakamahuki. Kia mataara! Ka nui te mihi ki ō tātou tumuaki katoa e whakapau kaha ana ki te hautū i ō tātou kura e angitu ai ā tātou uri! Toitū te tumuaki! Nā Julian Rolleston - Pou Arataki Ngā Kura ā Iwi o Aotearoa  I te wiki tuatoru o tēnei wāhanga, i huihui tahi ai ngā Uri o te Tiaki Taiao me te Rakahinonga ki runga o te marae o Mataatua ki Rotorua. Neke atu i te whitu tekau ngā tāngata, Uri mai, kaiako mai i tae haumaru atu ki te wānanga whakamutunga o te tau. Ko te aronga o ngā Uri Rakahinonga ko te tūtaki atu ki ētahi o ngā pakihi Māori i te pokapū o Rotorua, arā ko Ake, Ake, Ake, ko Digital Natives Academy, ā ko Aotearoa Dive anō hoki. Ko tā ngā Uri he ako i ngā rautaki whakatū pakihi. Katoa ēnei pakihi i ahu mai i te kōingo nui o ngā tāngata Māori ki ō rātou ao Māori. Waimaria katoa ngā uri i ēnā tāngata pūkenga rau kua para nei i te huarahi mō rātou te tira hou. Ko tā ngā Uri Tiaki Taiao he haere ki te ngahere o Okataina ki te mātai Taiao, te titiro ki ngā rautaki whakaora ngahere me te tae atu anō ki te whenua o Ohinemutu ki te whakamātau i ngā wai ngāwhā o reira. Mei kore ake ko ngā mātanga taiao o Te Arawa, ka kore hoki ēnei kaupapa e whai hua mā ngā Uri. Ko te haerenga whakamutunga ā te rōpū nei ko te kake i te maunga o Tarawera. I karapotihia mātou e te maunga tipua o Tarawera i a mātou e hīkoi ana, i ārahi ngā kaimanaaki i ngā rōpū, i whāngaihia e rātou ngā hītori me ngā mātauranga o te maunga o Ngāti Rangitihi, i kōrerohia ngā wāhi tapu, ngā wāhi hirahira me ngā wāhi tē taea te kite i ēnei rā. I kaha rongo mātou i te mana me te mauri o te maunga o Tarawera! Kei whea mai te motuhake o taua wāhi. I te pō whakamutunga i whakanuia e mātou o Te Whare Angitu ngā Manu Pīrere o te tau 2024. Ko ēnei Uri i tīmata i roto i te hōtaka o te Tiaki Taiao i te tau 2022, kua puta ngā ihu, kua eke rātou katoa ki te tihi o angitu i roto i ngā mahi katoa. E mihi ana mātou o Te Whare Angitu ki ēnei Uri, arā ki a Teina Harawira, Waimania Te Riini-Hale, Erica Tuwairua (Ruatoki) Jet Lee rāua ko Rihari Takawe (Te Kao) Nukuao Takao, Waitui Cooper, Rona Arahanga Ruri, Rangimarie Kara, Paretekohuru Maru-Hill (Whakatipuranga Rua Mano) rātou ko Tutepakorarangi Rua (Te Whānau ā Apanui) kua eke ki te tihi o angitu! E poho kererū ana mātou i a koutou! Whai mai i te whārangi Paeāhua a Te Whare Angitu mō ngā whakaahua o te wānanga nei! Tūwhitia te hopo, mairangatia te angitu! Nā Hannah Simmonds - Pou Angitu Ngā Kura ā Iwi o Aotearoa  |
