|
Tokoiwa ngā kura i whakakanohi mai i te wānanga nei i tū ai ki te hōtēra Distinction ki Kirikiriroa i ngā rangi o 16-17 Noema 2023. Tekau mā waru katoa ngā kaiako me ngā tumuaki. Anei ngā kura i tae mai:
I aronuitia ngā rautaki mō te hautū i Te Ara ToA me ngā ara hei whakatinana i Te Ara ToA ki te taha o ngā uri. Ko ētahi o ngā kaupapa whāiti i wānangahia, ko te whakawhanaungatanga i waenganui i ngā kaihautū me ngā kaimahi, te Pakiako hei huarahi aromatawai, he rauemi matihiko mō Te Ara ToA me ētahi ngohe hei tautoko i te reo ā-waha. Mīharo pai te katoa ki te kauhau a Tony Walker o Te Wharekura o Kirikiriroa mō tā rātou marau ā-kura ‘Te Pou ā Haokai’, te whakakaupapa i te marau, ngā paetohu e hāngai ana me te rauemi matihiko kua waihangatia mai hei tautoko. Kāore e ārikarika te mihi ki ngā kaikauhau katoa me ngā kaiako i tae mai. Nā Ani Rolleston - Pou Ara ToA Ngā Kura ā Iwi o Aotearoa  Ka rere ngā mihi ki ngā tai o Te Tokerau ki Te Oneroa a Tōhē. I tae atu ngā Uri o ngā hōtaka ToA Tiaki Taiao me Te Rakahinonga ki te marae o Pōtahi mo te wānanga whakamutunga o te tau. Mai i te tīmatanga o te noho ki te mutunga kua ako ngā uri, waihoki ko ngā Ringa Wera, ko ngā Kaitakawaenga o ngā kura i ngā pūkenga manomano mō te mahinga kai i tēnei whiore o te ika. Kua keria i ngā pipi, hī i ngā ika, katohia ngā kuku, tuwhera i te kina, mahiti i ngā tio. Kātahi rā ngā akoranga mō te mana motuhake! Kua tae atu ki te whitinga o te rā ki Te Rerenga Wairua ki te tuku i ngā karakia. Ko te pō whakanui i ngā tauira te kaupapa o te pō whakamutunga. Kua whakatairanga i a rātou whainga ki te eke ki te tihi o angitū. Mei kore Te Aupōuri i a tātou o Ngā Kura ā Iwi o Aotearoa. Ara ake 2024! Nā Hannah Simmonds - Pou Angitu Ngā Kura ā Iwi o Aotearoa  |
