|
I te 13-16 o Mei, i haere ngā uri o te ToA Tiaki Taiao L1 NCEA ki te moutere o Matakana. I kaha kite mātou i te whakatinanatanga o ngā uara o Te Whare Angitu ki tēnei o ngā wānanga uri. Ko te whanaungatanga tēnā, ko te tukuihotanga tēnā, ko te mahitahi tēnā. Nā te tokomaha (20 noa iho ngā uri) ka tino aro ngā uri ki ngā kaupapa - i taea e rātou te tuku pātai ki ngā kaiwhakahaere, me te hau kāinga e pā ana ki ngā mahi. Waimarie mātou i ngā whānau o Te Moutere o Matakana i āwhina mai i a mātou mō te roanga o tō mātou noho ki konā- ko Matua Julian, ko Matua Des rātou ko Whaea Christy, ko Whaea Ripeka me Te Kura o te Moutere o Matakana, ko Matua Steve, ōtirā, ki a Koro Bobby hoki - nāna te mana o te kaupapa i tiaki, nāna hoki ngā rangatahi i ārahi i roto i ngā kaupapa katoa. Waimarie anō hoki te haere ki ngā wāhi hirahira o te rohe - ko Mauao, ko Hinerape ētahi, ki reira rongo ai ngā uri i ngā kōrero tukuiho, i kite hoki i ngā rautaki whakarauora taiao. I akona e mātou tētahi o ngā waiata o Tauranga Moana, kātahi i whakaatu atu ngā uri i o rātou whakaari e hāngai ana ki ngā pūrākau o te rohe. Kātahi te katakata i rere atu i roto i te whare. Kei runga noa atu ngā uri me ō rātou pukenga whakaari! E ai ki ngā Uri, kua puta mai ngā hua maha: “I whai au te katakata, te harikoa, te aroha” “I ako ahau ngā kōrero e pā ana ki a Hinerape me ngā toka me ngā waka anō hoki” “Ko te mea tino pai rawa ki au ko ērā mahi ā-tīma ki te taha o Matua Des rāua ko Whaea Christy. Me te whanaungatanga” Ka tino kite i ngā hononga e tipu haere ana i waenganui i ngā uri, i whai ngā uri i ngā tapuwae o ngā tipuna, i rongo rātou i ngā whakapapa, i ngā kōrero tukuiho hoki hei ārahi i a tātou i tēnei ao hurihuri. Mihinui ki ngā whānau o te moutere o Matakana. Mihi hoki ki ngā roopu tautoko, ko Callaghan Innovation tētahi. He mea tautoko ēnei wānanga e rātou. Nō mātou te maringanui! E ai ki ngā kōrero a Koro Bobby ki ā mātou uri, me kaua tātou e wareware, “Tiaki te taiao, tiaki te whakapapa!” Nā Hannah Simmonds - Pou Angitu Ngā Kura ā Iwi o Aotearoa  I te 8 o Mei, i tū te Tōnama Riiki 9s mō Ngā Kura ā Iwi o Aotearoa ki Resthills Park, Kirikiriroa. E mihi ana ki a Eugene Davis, me ōna tīma Te Ahurei Rangatahi, nā rātou tēnei kaupapa i whakahaere. He rangi mokopuna, he rangi pai mō te whakataetae! I tae mai ngā tama, ngā kōtiro hoki e ngākaunui ana ki te riiki. Ko ngā teina (Tau 9-10), me ngā tuakana (Tau 11-13) ngā tīma i whakapau kaha i runga i te whīra. Ko ngā kura i tākaro:
Anō nei te kounga o tēnei hākinakina…i tino kite i ngā pūkenga maha o ngā uri, me te manawa nui, te manawa roa. I eke ēnei tīma ki te tihi o angitu:
Kua whiria hoki ētahi kaitakaro toa mō ia wāhanga:
Ka mau te wehi!! Mihi nui ki ngā uri me ngā kaiako i tae mai ki te tautoko i te kaupapa whakahirahira. Mihi mahana hoki ki ngā kaiwhakawā, nā rātou ngā kēmu e whakahaere. He rangi miharo, he rangi whai hua - ko ngā uri te take! Nā Hannah Simmonds - Pou Angitu Ngā Kura ā Iwi o Aotearoa  I te 9-10 o Mei, i kohikohi mai ngā kaiako kaiarataki me ētahi tumuaki hou ki ngā kura ā-iwi 11 o te motu ki Te Pae Tōmina i tū ai ki Waikato ki Kirikiriroa ki te hōtēra o Distinction i raro i ngā manaakitanga o Ngāti Mahanga me Ngāti Wairere. Ko ngā kaupapa matua o te wānanga ko ‘Mana Motuhake and Wellbeing in Leadership’, ā, i tutuki pū te kaupapa ngā taniwha hikuroa i tū ki te whakatakoto i ō rātou whakaaro rangatira, i ō rātou whakaaro hāngai marika ki te kaupapa o te wānanga! Ka mau tonu, ka mau tonu! Nō Te Pae Tōmina te maringanui i ēnei iho pūmanawa o te ao Mātauranga i whai waahi ki te wānanga nei:
Ka nui aku mihi maioha ki ēnei ika a Whiro! Nō Ngā Kura ā Iwi o Aotearoa te whiwhi nui! Tēnei te tira hou, te ngaru hou e mautohe nei!! Nā Cheryl Meek - Kaihautū Amorangi Ngā Kura ā Iwi o Aotearoa  |
