I te 8-9 o Māehe ka karapinepine atu ngā pakeke, ngā poumarumaru, me ngā tumuaki o Ngā Kura ā Iwi o Aotearoa ki Te Wānanga Arataki i tū ki Waikato, ki Kirikiriroa ki te hōtēra o Distinction i raro i ngā manaakitanga o Ngāti Mahanga me Ngāti Wairere.

Ko te kaupapa whānui o te wānanga ko ‘Te Whakaū i te Mana Motuhake’, ā, ka tino tutuki taua kaupapa i ngā pūkōrero pūwherowhero i tū ki te whakatakoto i ētahi whakaaro rangatira, i ētahi whakaaro hāngai tōtika ki te kaupapa o te wānanga! Ka mau te wehi!

Ka waimaria nui te wānanga i ēnei manu tāiko o te ao Māori i tae atu ki te takoha kupu ki te marea:

• Frances Goulton
• Tina Ngata
• Hana-Rawhiti Maipi-Clarke
• Ani Mikaere
• Te Rita Papesch me tana whānau.

Kāore e ārikarika ngā mihi ki ēnei iho pūmanawa! Nō Ngā Kura ā Iwi o Aotearoa te whiwhi nui!

Ka nui hoki ngā kai i hora ki ngā awheawhe i whakahaerehia hei āwhina i ngā pakeke, i ngā poumarumaru, i ngā tumuaki hoki:

• Keriana Tawhiwhirangi & Lynette Bradnam – Tupuranga Ngaio Tumuaki
• NZSTA – Governance 101 & Child Protection
• Henarata Ham & ERO – Ngā Kura ā Iwi o Aotearoa Review Framework
• Te Aoterangi Moore – Rautaki Reo
• Haimona Brown – Ngā mahi whakatere waka, tarai waka, me te maramataka
• Hannah Simmonds – Ngā kaupapa o Te Whare Angitu
• Ripeka Lessels & Te Rangihaeata Hare – Succession Planning

Ko te manako ia, he māramatanga, he hua nui i puta hei āwhina i ngā mana whakahaere o ngā kura e eke ai ā tātou uri ki te tihi o angitu!

​Nā
Julian Rolleston - Pou Arataki
​Ngā Kura ā Iwi o Aotearoa

Huri ake te mihi ki te haukāinga o Pākira marae, koutou o Ngāti Tutemohuta i tāwharautia i a mātou o Te Whare Angitū rātou ko ngā uri o Ngā Kura ā iwi o Aotearoa ki te tahuna o Taupō-nui-ā-Tia moana.

Kua emi ngā uri o te ToA Tiaki Taiao me te Rakahinonga mo te wānanga tuatahi o te tau. Kua rongo i te hikaka o ngā uri ki te pōwhiri tae noa atu ki te poroporoaki.

Kuhukuhuna mātou i te kaupapa ā iwi o he tipu ki te whakamakaru i ngā tipuranga harakeke ki te rongo hoki i te rautaki o te iwi ki te whai i te mana motuhake mō te kai. Ara i peka atu ki te Pouwhenua ki te ako i ngā hītori o te iwi. Kua hahau poro hoki ki te pakihi “Hole in One” o Tūwharetoa Trust Board. He miharo te kitenga i ngā āheinga o ngā rangatahi ki ēnei momo pakihi i Taupō. I mutu ana te rā tuatahi ki Otumuheke. I hikoi mātou i te taha o Waikato awa ki te Wairere o Huka. Kua kaukau i te waiariki i te hokinga atu.

He miharo anō te mahi o te rangi tuarua. I hoea ngā tai o te moana ki ngā waka ama o Taupō waka ama. I ako i ngā hua o te Para Kore i te māra o Te Kura Kaupapa Māori o Whakarewa i te Reo. Ara i whakaritea Te Kura o Waitahanui i te raihi miharo ki ngā wāhi hira o te taone. Kātahi te whanaungatanga ko tēnā.

He honore nui ki te whai i ngā wheako maha ki Taupō-nui-ā-Tia. Kātahi te wānanga ko tēnā! Kua kite i ngā mātapono i roto i ngā mahi katoa. Kua tau ngā uri hou ki ngā kaupapa o Te Whare Angitu, kua kite i te hari me te koa i roto i ngā akoranga katoa.

Nā
Tammy Nepata-Gibbs - Kaiārahi Taiao
​Ngā Kura ā Iwi o Aotearoa