|
Oranga Tumuaki Oranga Kura E mihi nui ana ki ngā tumuaki me ngā tumuaki tuarua i tae mai ki tō tātou wānanga Oranga Tumuaki Oranga Kura i tū ki roto o Tainui, i Kirikiriroa i te 23 o Nōema. I reira ka rangona ngā kōrero hauora i kauhautia e Tākuta Anna Rolleston. He kōrero whakahirahira i takohatia e ia hei whakatenatena i a tātou katoa ki te tiaki pai i a tātou anō. Whai muri i tana kauhau, ka noho ngā tumuaki ki te whakawhanaunga me ngā ngohe i whakaritea e Julian hei mahi mā rātou. Pakaru ana te katakata, he koanga ngakau, he pikinga wairua! Mutu kau ana taua mahi rā, ka taki haere ngā tumuaki me te kāhui pakeke ki Rangiriri ki te whakarongo ki ngā kōrero hītori, ki ngā kōrero nui o taua wāhi whakahirahira. E mihi nui atu ana ki a Brad Totorewa mā e tiaki ana i te mauri me te rangatiratanga o taua wāhi motuhake ō tātou. Ka hoki rawa ngā tumuaki ki te hōtera, ka kai, ā ka tū hoki ko te kaupapa kōrero o te pō, i kīa rā ko ‘Tūwhitia te Hopo’. I reira ka kōrero ētahi o ō tātou tumuaki mō te tekau meneti noa, ā, ka hāngai pū ā rātou kōrero ki te kaupapa o te pō, ki a ‘Tūwhita te Hopo’. Kātahi rā te pō mīharo ko tēnā! Kāore e ārikarika ngā mihi ki a Cheryl Meek, rātou ko Tamahaia Skinner, ko Keith Silveira, ko Renata Curtis mō rātou i tū ki te tuku i ētahi kōrero ataahua rawa atu! Ora ana te kaupapa i te noho tahi a ngā tumuaki o te motu! Tēnā rawa atu koutou katoa. Te Hui ā-Tau I te ata o te Paraire 24 o Nōema ka tū ko te hui ā tau o Ngā Kura ā Iwi o Aotearoa. E rere ana ngā whakamānawatanga ki ngā heamana takirua, ki a Arihia Stirling rāua ko Heywood Kuka e hautū nei i tō tātou komiti whāiti, ōtira ki te komiti whāiti katoa e kawe nei i ēnei mahi whakahirahira. E tika ana kia mihia a Arihia e heke nei i tana tūranga mōna i whakapau kaha, mō te hemo tonu atu, ki te ārahi i te kaupapa, ki te tohe i ngā tohe, ki te whakakanohi i a tātou ki ngā hui nui, ki te whakapūmau i te kaupapa ahakoa te aha. E mōhio ana, ka noho tata tonu mai a Arihia ahakoa te aha, engari me whakanui a ia ka tika. Nā reira e te pitau whakarei o te waka, e kore ngā mihi e mimiti noa. Tēnā rawa atu koe. Heoi anō, ko Cheryl Meek hoki tētahi e heke ana i te komiti whāiti i te mea hei te tau titoki ka tīmata mai a Cheryl hei Ringa Wera ki Ngā Kura ā Iwi o Aotearoa. E rere ana ngā mihi puhitaioreore ki a Cheryl mō ana mahi nunui ki te komiti whāiti. He hinengaro koi, he ngakau nui tōna, he ringa rehe ōna. Tēnā koe Cheryl me ō mahi huhua ki te komiti whāiti. Tēnā rawa atu koe. Heoi anō, i te hui ā tau, ka whakatauria hoki ngā mema hou ki te komiti whāiti. E mihi ana ki a Tamahaia Skinner, tumuaki ki Te Kura o Kokohuia, ki a Hira Hona hoki, tumuaki ki Te Kura o Matapihi, kua whakamanahia hei mema hou. Tēnā kōrua e hiki nei i te mānuka hei kawe i ngā mahi nui hei oranga mō tō tātou kaupapa! Te Whakatau i ngā Kura Hou Piki mai kake mai, nau mai haere mai e ngā kura hou e rima ki te kaupapa o Ngā Kura ā Iwi o Aotearoa! I te Paraire te 24 o Nōema i pōhiritia ngā kura hou, ā, e tupu kau ana tō tātou kaupapa! E mihi atu ana ki ngā iwi, ki ngā hapū, ki te hunga pakeke i takahi mai i ngā rori ki Waikato ki te tautoko i ō rātou kura i kuhu ōkawa mai rā ki te kaupapa. Nau mai whakatau mai ki ēnei kura:
Te Kāhui Pakeke He hōnore nui te piringa mai o ngā pakeke ki ngā hui o Ngā Kura ā Iwi o Aotearoa. I te hui Te Ara Mātiti ka whakakao mai anō ngā pakeke o ngā kura ki te wānanga tahi. Ko Enoka Rolleston rāua ko O'Sonia Hoterini ngā pakeke ārahi i tēnei rōpū rangatira. E rere ana te aroha nui ki tēnei rōpū pakeke e noho nei hei taituara i te kaupapa, hei hunga tiaki i te mauri me te mana i tō tātou taonga. Ko te whakahau a Enoka rāua ko O'Sonia ki ngā kura, kia kaha rā ki te heri mai i ō koutou pakeke ki ngā hui hei te tau 2024 e reka ai te wānanga me te kaupapa. Nā Julian Rolleston - Pou Arataki Ngā Kura ā Iwi o Aotearoa  |
