|
I noho hōpuni whakawhanake ngā Uri Taihine o Toi Arikikura Whutupōro (Rohe o Waiariki) ki roto o Tauranga Moana I ngā wiki kua hori. I tae mai ngā uri nō Te Wharekura o Ruatoki, Te Wharekura o Mauao, Te Kura ā Iwi o Whakatupuranga Rua Mano, Te Kura o Whangaparaoa, Te Kura o Hīrangi me Te Whatatau o Pūtauaki, i a rātau Uri e kai ngākau nui ana ki te Whutupōro Ūniana ki te whakangungu, ki te whakahoahoa anō hoki ki ngā uri o Kura kē. I tākaro ngā kōtiro Ngā Kura ā Iwi o Aotearoa U18 ki tētahi kapa Pacifica, hei kēmu whakarewa i te rā mā ngā Bay of Plenty Volcanix, ki Whakatane Rugby Park i te Rātapu 20 Akuhata. I whakatutuki i a rātou ngā mahi whakangungu katoa, i whai wā rātou ki te whakawhanaunga ā ki te whakapakari i ō rātou ake whāinga, wheako anō hoki. Kāore e mutu ngā mihi ki ngā pakeke nō ia kura i tae mai ki te manaaki, ki te āwhina i tēnei kaupapa ā tatou. Me mihi kau ana ki a Ati Aaifou-Olive nō Bay of Plenty Rugby Union mō tōna whakapau werawera ki tēnei o ngā kaupapa Whutupōro ā tātou. E rere ana ngā mihi ki a koutou ngā ringa hāpai i te kaupapa! Tēnā tomo mai ki te Paeāhua o Te Whare Angitu mō ngā kaupapa katoa e pā ana ki ā tātou Uri. Nā Hannah Simmonds - Pou Angitu Ngā Kura ā Iwi o Aotearoa 
0 Comments
I tae atu ngā Uri o ToA Tiaki Taiao ki te whārua o Ruatoki ki te mātai i te taiao o Tūhoe Pōtiki. Me mihi ka tika ki te haukāinga o Waikirikiri Marae mō tā rātou manaaki i a mātou, i tino rongo i te wairua manaaki me te ngākau māhorahora! Ko te matū o ēnei wānanga ko te whakawhanaungatanga i waenganui i ngā uri, ko te toha i ngā mātauranga taketake o ia takiwā me te mātai i ngā taiao me ngā tūtohu whenua o ia rohe. Ka kaha rongo nei mātou i te wairua whakahoahoa, wairua hīkaka i waenganui i ā mātou Uri i ēnei wānanga. Waimaria ēnei uri te noho tahi me ngā mātanga mātai taiao, ngā pou mātauranga o taua takiwā, ko Te Puni Tiakiwai, ko Tāme Iti, rātou ko Ati Teepa ētahi i tae mai ki te tautoko i tā mātou kaupapa, i ārahi anō hoki ā mātou Uri ki runga i ngā whenua o Ruatoki, o Te Urewera anō hoki. Te mutunga kē mai o te wheako nui mā mātou katoa o Te Whare Angitu! Tomo mai ki tā mātou Paeāhua, Te Whare Angitu, kia kite ai koutou i ngā pitopito kōrero me ngā whakaahua o tēnei o ngā haerenga mīharo! Nā Hannah Simmonds - Pou Angitu Ngā Kura ā Iwi o Aotearoa  Anō te pai te āhuareka o te ikapahi mai o ngā kura ki runga o Te Rotorua-nui-a-Kahumatamomoe. Kātahi rā te hui whai hua, whai oranga anō hoki ko Te Pūtahi Nui 2023. Kua rangatira tō tātou kaupapa i ngā kaikōrero, ngā kaihuawaere, ngā kaitautoko i tae i runga i te karanga o mana motuhake, tino rangatiratanga me te kotahitanga. Neke atu i te 600 ngā kaimahi nō ngā kura i tae ki te hui, he tika te kī kua hapū te whare! Hei āpiti, e ai ki te kōrero arotake he hui whai hua ā-ngaio, ā-hinengaro, ā-wairua anō hoki. Heoi ki te whakaaro nei ahau he aha ngā kura huna o te hui nei mōku? Ka mate rānei ahau mō te kaupapa koia i uia mai e Raneira Procter, Te Pūtahi Nui 2023 (TPN, 2023). Ko tāna whai kia akiaki ai i a tātou kia warowaro ai te reo ki roto i o tātou kura. He mea whakaoho mai tātou kia pūmau, kia tōtika tō tātou whakapono ki te kaupapa pērā i a rātou o ngā tau 30 o mua. Kei a koutou te oranga o ngā mokopuna āpōpō; You’re important you touch our mokopuna Kahurangi Iritana Tāwhiwhirangi (TPN, 2023) He whakahau nui tēnei ki a au me matua mōhio tātou i a tātou haepapa nui ki te tiaki me te poipoi i a tātou uri i runga i te ngākau tika, ka eke te uri ki tōna ake angitūtanga. Titiro ki te pae tawhiti kumea kia tata, Hoturoa Barclay-Kerr (TPN, 2023) Kumea kia tata, mā tātou anō ā tātou ara e hautū koia te ngako o tā Hoturoa kōrero ki a au ko tātou anō ngā kaihautū o tō tātou ara whakamua, nō reira āe, kia kaha te moemoea ka taea e tātou. Heoi ka hoki nei au ki Whāea Naida (TPN 2023) Kia kaha tātou ki te tiaki i tō tātou whakapapa! Koia hoki te pūtaketanga o Ngā Kura ā-Iwi kāore tātou i te whakaako i ngā tauira kei te whakaako tātou i ngā uri, ngā mokopuna, ngā mangaina ki o rātou ake angitūtanga! E hoa mā, arā noa atu āku akoranga ki Te Pūtahi Nui 2023! Heoi mō te taha whaiaro ānei āku whakaritenga mō te tau heke - tuatahi me penapena ahau i taku pūtea mo te mākete, kei mahue nei ahau i ētehi “rauemi mo tōku akomanga”; tuarua kia kaua au e hoko he kawhe i mua i tāku taenga ki te wāhi hui - he toa kawhe reka utu kore ki reira, ā ko te akoranga tuatoru me tae wawe au ki ngā awheawhe kei aukati kē te tatau. Āe kua rite ahau mō Te Pūtahi Nui 2024 - hara mai tētehi āhua! Nā Sophie Tukukino - Pou Whanake Ngā Kura ā Iwi o Aotearoa  |
