ORANGA TUMUAKI ORANGA KURA

I te 06-07 o Hune ka tū te wānanga o Oranga Tumuaki Oranga Kura ki Te Kura o Hīrangi, ki Tūrangi, ki roto o Ngāti Tūwharetoa. Ko Oranga Tumuaki Oranga Kura tētahi wānanga motuhake hei tautoko, hei whakakotahi, hei whakangūngū hoki i ngā tumuaki o Ngā Kura ā Iwi o Aotearoa.

Kāore e ārikarika ngā mihi ki ngā pūkōrero i tū ki te takoha i ētahi whakaaro rangatira hei whakakipakipa i ngā tumuaki.

Ka mihi rā ki te wahine toa, ki a Annette Sykes, mōnā ētahi kōrero rangatira i whakatakoto mō te hītori o ētahi o ngā kaupapa mana motuhake o te motu me ana kōrero whakahau i ngā tumuaki kia kaha tonu ki te takahi i te huarahi hei oranga mō ā tātou uri.

He mīharo ngā kōrero a te pae tumuaki i kōrero mō te oranga. Nā rātou ētahi whakaaro i tuku hei āwhina i ngā tumuaki ki te tiaki i a rātou anō i roto i ngā mahi. E mihi ana ki te pae nei, ki a Hare Rua nō Te Kura Kaupapa Māori o Hōani Waititi, ki a Michelle Treadaway-Ohia nō Ngā Taiātea Wharekura, ki a Heywood Kuka nō Te Wharekura o Mauao, ki a Tanira Cooper nō Te Kura ā Iwi o Whakatupuranga Rua Mano. Tēnā koutou katoa.

I te ahiahi o te Taite ka peka atu ki ētahi o ngā wāhi whakahirahira o te takiwā, ki  Ōpōtaka, ki Pūkawa hoki, ki reira whakarongo ake ai ki ngā kōrero tuku iho o ēnei wāhi whakahirahira o Ngāti Tūwharetoa. Ka nui te mihi o te ngākau ki ngā rangatira o Ngāti Tūwharetoa nā rātou ngā kōrero i tuku hei taonga pupuri mā mātou.

I te pō o te Taite ka kai ngā tumuaki ki te mahanatanga o Tongariro Lodge, ā, ki reira ka waimaria te whakarongo atu ki a Te Rangi Hemi rāua ko Henarata Ham e kōrero ana mō ā rāua noho roa ki te tūranga o te tumuaki, ā, ki ā rāua whakaritenga mō te wehe i te tūranga ā tōna wā. Kāore e ārikarika ngā mihi ki ēnei tino pou o te kaupapa kua roa nei e hautū kura ana. Tēnā rawa atu kōrua.

Ao ake i te rā, ka tīmata te rangi tuarua o te wānanga. Ko te kaikōrero tuatahi ko Ruita Taiapa. He mātanga a Ruita mō Te Reo Matatini, ā, koia te kaupapa i kawehia e ia ki te wānanga o Oranga Tumuaki Oranga Kura. He nui te māramatanga i hua ake i tēnei wāhanga o te wānanga mō tēnei kaupapa nui, arā, mō Te Reo Matatini. Kei runga noa atu ngā mahi a Ruita! Ka nui te mihi.

Ko te kaupapa tuarua o te Paraire ko te āta wānanga i ngā āhuatanga o te Uri Whai Mana Motuhake. Ko te pātai nui, he aha pū ngā āhuatanga e tika ana kia kitea i roto i te uri hei tana wehenga i te kura? He aha ō tātou tūmanako mō ā tātou uri? Nā tō tātou Pou Kōkiri, nā Watson Ohia taua wāhanga i arataki ki tētahi tukunga motuhake. E mihi nui ana ki ngā whakaaro katoa i puta ake i tēnei wāhanga o te rā. Ka mau te wehi!

Hei whakakapi ake, e kore noa ngā mihi e mimiti noa ki a Henarata, ōtira ki te whānau whānui o Te Kura o Hīrangi mō rātou i kaha manaaki mai i te wānanga. Ka ora kaha rawa atu te kaupapa i te nui o ngā manaakitanga i rangona i te roanga o te wānanga. Kei aku rangatira, tēnā rawa atu koutou katoa.

Kāti ake, ka tū te wānanga tuarua o Oranga Tumuaki Oranga Kura hei te marama o Nōema. Nō reira hei te wā titoki e tai mā. Kia manaakita nuitia koutou, ōtirā tātou katoa e te wāhi ngaro. Tēnā koutou katoa.

Nā
Julian Rolleston - Pou Arataki
Ngā Kura ā Iwi o Aotearoa

>> oranga tumuaki oranga kura