|
Kei tōku reo auraki mai rā, waihape mai rā Ki tōku poho, ki tōku ngākau, ki tōku arero, ki tōku katoa Kia ora tonu ai koe i ngā tau tini, tau mano Mō te ake, ake haere ake nei. Hei! I tau atu te maha o ngā uri me ō rātau kaiako ki Ngā Taiatea Wharekura i te 13 ki te 16 o Maehe. Ā, kia rumakihia ki te whānuitanga, ki te hōhonutanga me te wairuatanga o te reo me ōna tikanga. Tēnā rā koutou e ngā toki, e ngā mātanga o te ao Māori, o te ao mātauranga. I whakahokia mai ai te taonga ki te mata o te arero, ki te ngākau o te uri:
E mihi kau ana i runga o ngā manaakitanga. Nā Kimiora Webster - Kaihautū Tukuihotanga Ngā Kura ā Iwi o Aotearoa  Nō te 13-14 o Pēpuere, whakaikapahi atu ngā tumuaki me ngā pou o ngā kura ki Tāmaki Makaurau ki te wānanga o Oranga Tumuaki Oranga Kura. I reira ka āta ruku ki ngā kaupapa whakangūngū e whakahaeretia ana e Ngā Kura ā Iwi o Aotearoa (NKAI) i tēnei tau, arā ko:
Ka nui te mihi ki ngā pūkenga i whakaaro nui mai ki te tautoko i te kaupapa:
Nō tātou hoki te whiwhi nui kia whai wāhi atu ki te kuhu ki Te Kura Māori o Ngā Tapuwae i te rā tuarua o te wānanga ki te whakarongo ki ngā kōrero rangatira o tēnei kura whakahirahira o tātou. Tēnā koe Arihia, koutou ko te tira o Ngā Tapuwae mō koutou i manaaki mai i te reo karanga. Kāti ake e hika mā, anō te āhua reka o te noho tahi a te tuakana me te teina i runga i te kaupapa kotahi. Ngā manaakitanga nui. Nā Julian Rolleston - Pou Arataki Ngā Kura ā Iwi o Aotearoa  I te 12 o Pēpuere ka rewa te hōtaka Tupuranga Ngaio 2025 ki Tāmaki Makaurau. He hōtaka tēnei hei manaaki i ngā tumuaki o NKAI ki te whakatutuki i a rātou ngā mahi tupuranga ngaio. Ko Keriana Tawhiwhirangi rāua ko Lynette Bradnam ngā pou matua o tēnei kaupapa. E toru ngā wānanga ā tīnana o tēnei hōtaka, ā, ko ngā akoranga katoa e hāngai ana ki ngā mahi hei kaihautū, hei tumuaki. E mihi ana ki ēnei tumuaki i tau mai ki te wānanga tuatahi:
Nā Julian Rolleston - Pou Arataki Ngā Kura ā Iwi o Aotearoa  |
