I huihui ai ngā uri nō ngā kura ā-iwi o te motu ki roto o Te Arawa waka i tēnei wiki, ko te kaupapa whakahirahira ake nei ko Te Ahi Orokohanga. He kaupapa E-Sports tēnei e whakanui ana i te ao hangarau matihiko. Ko tā te mahi a ngā uri he waihanga i te marae o anamata. I tae mai ngā kura e 16 me a rātou uri 132 ki te kaupapa nei. E 33 ngā tīma i tū ki runga i te atāmira i taua rangi me te mīharo hoki o ā rātou mahi.
I whai wā ngā uri ki te whakaatu i o rātou tini pūkenga e pā ana ki te waihanga marae i roto i te ao Minecraft. He mahi taki whā, mā ngā uri ngā mahere marae e whakarite, mā rātou anō e hanga i taua marae i runga i te atāmira whakataetae. I tino kite i te auahatanga o ēnei uri i roto i a rātou hanga katoa. Ko te kotahitanga me te wairua whakawhanaungatanga te hua nui i puta i tēnei kaupapa. I te otinga atu i eke ēnei kura ki te tihi o angitu mō tēnei kaupapa:
Kāore e mutu ngā mihi ki ngā ringa hāpai i tēnei o ngā kaupapa, ko Digital Natives Academy, ko Te Papatipu Matihiko, ā, ko Local Gecko Productions anō hoki. Waihoki ko ngā kaitautoko pūtea ko Rotorua Trust, ko One Foundation rātou ko Ipurangi Aotearoa. Mei kore ake koutou hei tautoko i a mātou. Nā Hannah Simmonds - Pou Angitu Ngā Kura ā Iwi o Aotearoa
0 Comments
I te 8-9 o Māehe ka karapinepine atu ngā pakeke, ngā poumarumaru, me ngā tumuaki o Ngā Kura ā Iwi o Aotearoa ki Te Wānanga Arataki i tū ki Waikato, ki Kirikiriroa ki te hōtēra o Distinction i raro i ngā manaakitanga o Ngāti Mahanga me Ngāti Wairere.
Ko te kaupapa whānui o te wānanga ko ‘Te Whakaū i te Mana Motuhake’, ā, ka tino tutuki taua kaupapa i ngā pūkōrero pūwherowhero i tū ki te whakatakoto i ētahi whakaaro rangatira, i ētahi whakaaro hāngai tōtika ki te kaupapa o te wānanga! Ka mau te wehi! Ka waimaria nui te wānanga i ēnei manu tāiko o te ao Māori i tae atu ki te takoha kupu ki te marea:
Kāore e ārikarika ngā mihi ki ēnei iho pūmanawa! Nō Ngā Kura ā Iwi o Aotearoa te whiwhi nui! Ka nui hoki ngā kai i hora ki ngā awheawhe i whakahaerehia hei āwhina i ngā pakeke, i ngā poumarumaru, i ngā tumuaki hoki:
Ko te manako ia, he māramatanga, he hua nui i puta hei āwhina i ngā mana whakahaere o ngā kura e eke ai ā tātou uri ki te tihi o angitu! Nā Julian Rolleston - Pou Arataki Ngā Kura ā Iwi o Aotearoa Huri ake te mihi ki te haukāinga o Pākira marae, koutou o Ngāti Tutemohuta i tāwharautia i a mātou o Te Whare Angitū rātou ko ngā uri o Ngā Kura ā iwi o Aotearoa ki te tahuna o Taupō-nui-ā-Tia moana.
Kua emi ngā uri o te ToA Tiaki Taiao me te Rakahinonga mo te wānanga tuatahi o te tau. Kua rongo i te hikaka o ngā uri ki te pōwhiri tae noa atu ki te poroporoaki. Kuhukuhuna mātou i te kaupapa ā iwi o he tipu ki te whakamakaru i ngā tipuranga harakeke ki te rongo hoki i te rautaki o te iwi ki te whai i te mana motuhake mō te kai. Ara i peka atu ki te Pouwhenua ki te ako i ngā hītori o te iwi. Kua hahau poro hoki ki te pakihi “Hole in One” o Tūwharetoa Trust Board. He miharo te kitenga i ngā āheinga o ngā rangatahi ki ēnei momo pakihi i Taupō. I mutu ana te rā tuatahi ki Otumuheke. I hikoi mātou i te taha o Waikato awa ki te Wairere o Huka. Kua kaukau i te waiariki i te hokinga atu. He miharo anō te mahi o te rangi tuarua. I hoea ngā tai o te moana ki ngā waka ama o Taupō waka ama. I ako i ngā hua o te Para Kore i te māra o Te Kura Kaupapa Māori o Whakarewa i te Reo. Ara i whakaritea Te Kura o Waitahanui i te raihi miharo ki ngā wāhi hira o te taone. Kātahi te whanaungatanga ko tēnā. He honore nui ki te whai i ngā wheako maha ki Taupō-nui-ā-Tia. Kātahi te wānanga ko tēnā! Kua kite i ngā mātapono i roto i ngā mahi katoa. Kua tau ngā uri hou ki ngā kaupapa o Te Whare Angitu, kua kite i te hari me te koa i roto i ngā akoranga katoa. Nā Tammy Nepata-Gibbs - Kaiārahi Taiao Ngā Kura ā Iwi o Aotearoa |