Huri ake te mihi ki te haukāinga o Pākira marae, koutou o Ngāti Tutemohuta i tāwharautia i a mātou o Te Whare Angitū rātou ko ngā uri o Ngā Kura ā iwi o Aotearoa ki te tahuna o Taupō-nui-ā-Tia moana.
Kua emi ngā uri o te ToA Tiaki Taiao me te Rakahinonga mo te wānanga tuatahi o te tau. Kua rongo i te hikaka o ngā uri ki te pōwhiri tae noa atu ki te poroporoaki. Kuhukuhuna mātou i te kaupapa ā iwi o he tipu ki te whakamakaru i ngā tipuranga harakeke ki te rongo hoki i te rautaki o te iwi ki te whai i te mana motuhake mō te kai. Ara i peka atu ki te Pouwhenua ki te ako i ngā hītori o te iwi. Kua hahau poro hoki ki te pakihi “Hole in One” o Tūwharetoa Trust Board. He miharo te kitenga i ngā āheinga o ngā rangatahi ki ēnei momo pakihi i Taupō. I mutu ana te rā tuatahi ki Otumuheke. I hikoi mātou i te taha o Waikato awa ki te Wairere o Huka. Kua kaukau i te waiariki i te hokinga atu. He miharo anō te mahi o te rangi tuarua. I hoea ngā tai o te moana ki ngā waka ama o Taupō waka ama. I ako i ngā hua o te Para Kore i te māra o Te Kura Kaupapa Māori o Whakarewa i te Reo. Ara i whakaritea Te Kura o Waitahanui i te raihi miharo ki ngā wāhi hira o te taone. Kātahi te whanaungatanga ko tēnā. He honore nui ki te whai i ngā wheako maha ki Taupō-nui-ā-Tia. Kātahi te wānanga ko tēnā! Kua kite i ngā mātapono i roto i ngā mahi katoa. Kua tau ngā uri hou ki ngā kaupapa o Te Whare Angitu, kua kite i te hari me te koa i roto i ngā akoranga katoa. Nā Tammy Nepata-Gibbs - Kaiārahi Taiao Ngā Kura ā Iwi o Aotearoa Ko te rere o ngā whakamiha ki a koutou ngā Tumuaki, ngā Kaiako me ngā Mema Poumarumaru i tae ā-tinana mai ki te Wānanga Kura Whakawhiti i tū ki te urutaumatua o ngā hui Ngā Kura ā-Iwi, ara Distinciton ki Rotorua i ngā rangi 19 me te 20 Pēpuere.
He wānanga mā ngā kura e whakawhiti mai i te kura auraki hei kura reo Māori. Ka aro atu ēnei kura nei ki te whakatakoto rautaki i te reo Māori hei ako i te reo Māori, mā te reo Māori. Tekau mā tahi ngā kura, toru tekau mā rima ngā tāngata i tae mai ki te wānanga i ngā kaupapa e whai ake nei:
Nō mātau te whiwhi i tae mai a Hemi Takawe, Tumuaki o Te Kura o Te Kao rāua ko Anaru Rieper, he kaiako i Te Kura o Te Kao hei kaikōrero ki tēnei kaupapa Kura Whakawhiti. I kōrero mai rātau i tā rātau hikoi ki te whakawhiti i te kura hei kura reo Māori. Tau kē ngā mahi a te hunga i tae mai ki tēnei hui, ka mutu i pai te nohotahi ā-kura nei ki te wānanga, ki te wherawhera, ki te kimi i te huarahi whakamua hei whakatairanga, hei whakapiki i te kounga o te reo Māori me te ao Māori i tō rātau kura. Ka hoki ki te tīmatatanga o tēnei korero, ko te rere o ngā whakamiha ki a koutou katoa. Nā Kimiora Webster - Kaihautū Reo Māori Ngā Kura ā Iwi o Aotearoa Oranga Tumuaki Oranga Kura
E mihi nui ana ki ngā tumuaki me ngā tumuaki tuarua i tae mai ki tō tātou wānanga Oranga Tumuaki Oranga Kura i tū ki roto o Tainui, i Kirikiriroa i te 23 o Nōema. I reira ka rangona ngā kōrero hauora i kauhautia e Tākuta Anna Rolleston. He kōrero whakahirahira i takohatia e ia hei whakatenatena i a tātou katoa ki te tiaki pai i a tātou anō. Whai muri i tana kauhau, ka noho ngā tumuaki ki te whakawhanaunga me ngā ngohe i whakaritea e Julian hei mahi mā rātou. Pakaru ana te katakata, he koanga ngakau, he pikinga wairua! Mutu kau ana taua mahi rā, ka taki haere ngā tumuaki me te kāhui pakeke ki Rangiriri ki te whakarongo ki ngā kōrero hītori, ki ngā kōrero nui o taua wāhi whakahirahira. E mihi nui atu ana ki a Brad Totorewa mā e tiaki ana i te mauri me te rangatiratanga o taua wāhi motuhake ō tātou. Ka hoki rawa ngā tumuaki ki te hōtera, ka kai, ā ka tū hoki ko te kaupapa kōrero o te pō, i kīa rā ko ‘Tūwhitia te Hopo’. I reira ka kōrero ētahi o ō tātou tumuaki mō te tekau meneti noa, ā, ka hāngai pū ā rātou kōrero ki te kaupapa o te pō, ki a ‘Tūwhita te Hopo’. Kātahi rā te pō mīharo ko tēnā! Kāore e ārikarika ngā mihi ki a Cheryl Meek, rātou ko Tamahaia Skinner, ko Keith Silveira, ko Renata Curtis mō rātou i tū ki te tuku i ētahi kōrero ataahua rawa atu! Ora ana te kaupapa i te noho tahi a ngā tumuaki o te motu! Tēnā rawa atu koutou katoa. Te Hui ā-Tau I te ata o te Paraire 24 o Nōema ka tū ko te hui ā tau o Ngā Kura ā Iwi o Aotearoa. E rere ana ngā whakamānawatanga ki ngā heamana takirua, ki a Arihia Stirling rāua ko Heywood Kuka e hautū nei i tō tātou komiti whāiti, ōtira ki te komiti whāiti katoa e kawe nei i ēnei mahi whakahirahira. E tika ana kia mihia a Arihia e heke nei i tana tūranga mōna i whakapau kaha, mō te hemo tonu atu, ki te ārahi i te kaupapa, ki te tohe i ngā tohe, ki te whakakanohi i a tātou ki ngā hui nui, ki te whakapūmau i te kaupapa ahakoa te aha. E mōhio ana, ka noho tata tonu mai a Arihia ahakoa te aha, engari me whakanui a ia ka tika. Nā reira e te pitau whakarei o te waka, e kore ngā mihi e mimiti noa. Tēnā rawa atu koe. Heoi anō, ko Cheryl Meek hoki tētahi e heke ana i te komiti whāiti i te mea hei te tau titoki ka tīmata mai a Cheryl hei Ringa Wera ki Ngā Kura ā Iwi o Aotearoa. E rere ana ngā mihi puhitaioreore ki a Cheryl mō ana mahi nunui ki te komiti whāiti. He hinengaro koi, he ngakau nui tōna, he ringa rehe ōna. Tēnā koe Cheryl me ō mahi huhua ki te komiti whāiti. Tēnā rawa atu koe. Heoi anō, i te hui ā tau, ka whakatauria hoki ngā mema hou ki te komiti whāiti. E mihi ana ki a Tamahaia Skinner, tumuaki ki Te Kura o Kokohuia, ki a Hira Hona hoki, tumuaki ki Te Kura o Matapihi, kua whakamanahia hei mema hou. Tēnā kōrua e hiki nei i te mānuka hei kawe i ngā mahi nui hei oranga mō tō tātou kaupapa! Te Whakatau i ngā Kura Hou Piki mai kake mai, nau mai haere mai e ngā kura hou e rima ki te kaupapa o Ngā Kura ā Iwi o Aotearoa! I te Paraire te 24 o Nōema i pōhiritia ngā kura hou, ā, e tupu kau ana tō tātou kaupapa! E mihi atu ana ki ngā iwi, ki ngā hapū, ki te hunga pakeke i takahi mai i ngā rori ki Waikato ki te tautoko i ō rātou kura i kuhu ōkawa mai rā ki te kaupapa. Nau mai whakatau mai ki ēnei kura:
Te Kāhui Pakeke He hōnore nui te piringa mai o ngā pakeke ki ngā hui o Ngā Kura ā Iwi o Aotearoa. I te hui Te Ara Mātiti ka whakakao mai anō ngā pakeke o ngā kura ki te wānanga tahi. Ko Enoka Rolleston rāua ko O'Sonia Hoterini ngā pakeke ārahi i tēnei rōpū rangatira. E rere ana te aroha nui ki tēnei rōpū pakeke e noho nei hei taituara i te kaupapa, hei hunga tiaki i te mauri me te mana i tō tātou taonga. Ko te whakahau a Enoka rāua ko O'Sonia ki ngā kura, kia kaha rā ki te heri mai i ō koutou pakeke ki ngā hui hei te tau 2024 e reka ai te wānanga me te kaupapa. Nā Julian Rolleston - Pou Arataki Ngā Kura ā Iwi o Aotearoa |