TOITŪ TE TUMUAKI: ORANGA TUMUAKI ORANGA KURA

Huihuia mai rā ngā tumuaki o Ngā Kura ā Iwi o Aotearoa ki runga o Waikato, ki Kirikiriroa, i te 14-15 o Nōema, i reira wānanga tahi ai i ngā āhuatanga o te ao tumuaki.

Heoi, ko te kaupapa tuatahi o taua Taite, ko te tautoko i te hīkoi mō te Tiriti i tū ki ngā rori o Kirikiriroa o taua ata. Kāore i kō atu, kāore i kō mai i tētahi kaupapa pērā hei mahi timatanga mō te wānanga Oranga Tumuaki Oranga Kura! Toitū te mana motuhake o te iwi Māori! Toitū te Tiriti!

Mutu kau ana te hīkoi, ka hoki ngā tumuaki ki te hōtērā, i reira tīmata ai ngā mahi wānanga. Ka nui te mihi ki a Haani Huata-Allan, nānā te wānanga o te ahiahi i whakahaere. Ko tana kaupapa, ko te whakaako i ngā āhuatanga o te Tetra Map. He rauemi tēnā hei āwhina i te tangata kia hōhonu ake tōna mārama ki a ia anō, kia hōhonu ake hoki tana mārama ki tangata kē atu. Nā reira he tino taonga te rauemi nei hei āwhina i te tumuaki i roto i ana mahi hei kaihautū.

I te ahiahi o te Taite, i whakahaerehia ētahi wero, ētahi mahi whakataetae i waenga nui i ngā tumuaki.Ka pakaru katoa te katakata, ā, ka rongo i te wairua pārekareka e rere ana i waenganui i ngā tumuaki. Ka mau te wehi!

I te rā tuarua o te wānanga, ka wānangahia ngā āhuatanga o te Tohu Pī Rere, ā, ka noho hoki ngā tumuaki ki te whakarongo ki ngā kōrero mō ngā kaupapa nui ka kōkirihia e NKAI hei tautoko i ngā kura hei te tau 2025 e tū mai nei.

I te ahiahi o te Paraire, i pōhiritia ngā kura hou ki te kaupapa o NKAI. Ko ngā kura hou i uru mai ki te kaupapa i tēnei tau ko:

• Te Kura o Hiruharama - Ngāti Porou
• Te Kura o Hāpuku - Kaikoura
• Te Kura o Waihārara - Te Tai Tokerau

Nau mai, haere mai, nau mai piri mai ki ēnei kura hou! Ināianei, kua 51 ngā kura o NKAI! Hara mai tētahi āhua!

Kāti ake, hei te 13-14 o Pēpuere, tu ai te wānanga Oranga Tumuaki, Oranga Kura tuatahi mō te tau 2025. Kāre e roa, ka puta ngā whakamahuki. Kia mataara!

Ka nui te mihi ki ō tātou tumuaki katoa e whakapau kaha ana ki te hautū i ō tātou kura e angitu ai ā tātou uri! Toitū te tumuaki!

Nā
Julian Rolleston - Pou Arataki
Ngā Kura ā Iwi o Aotearoa

>> oranga tumuaki oranga kura