|
Nō te 12 o Akuhata, ka rāhiri atu ngā uri taumata 2 me te 3, o te hōtaka Tiaki Taiao ki te poho o Huri, i te marae o Pikitū, ki Te Waotū. Ko ētahi o ngā uri, kua roa e whakakanohi ana i ō rātou kura ki ngā wānanga uri, ko ētahi he kanohi hōu. Hāunga ko ngā mahi aromatawai, ko te aronga nui o tēnei wānanga ko te whakaara ake anō i ngā mātāpono o Te Whare Angitu ki roto i ngā uri tuakana, me te whakamanawa ki roto i te ranga hōu. Me mātua mihi ki te whānau o Pikitū, o Ngāti Huri, i tō rātou kaha hāpai i ngā haepapa tiaki i te taiao. Nā tō rātou whakaako, tō rātou whakatauira hoki i ngā mahi para kore, i mārama ngā uri ki te hirahira me te rangatira o tēnei mea te “tiaki me te manaaki i te taiao.” I te rā tuarua o tēnei noho, ka toro atu ngā uri ki ngā waahi tāpua o te takiwa. Ka ārahina ngā uri e tētahi roopu o te haukāinga, a Papa Anaru Begbie, Whaea Naomi Simmonds me Whaea Lisa Begbie ki te pā wai o Arapuni. I reira ka puaki mai ai ngā kōrero mō te tuna me ōna āhuatanga ariki ki ngā hapū e whai pānga ana ki taua pā wai, otirā, tō rātou rautaki whakarauora i te awa me ngā tuna. I mua tonu i te pekanga ki te whenua tāpui o Hēmi Pānete ki te tina, ka whakawhiti atu mātou ki te pā o Puketotara. I a mātou i te pā, ka tākina mai e Papa Anaru ngā kōrero tuku iho mō te iwi o Raukawa me te whakahuanga o te tāone ki tōna ingoa o Putāruru, nā, ka whai whakaaro ētahi o ngā uri ki te whakaari ā-kiriata i tēnei o ngā kōrero, hei pupuringa rauemi mō Te Whare Angitu. Nō muri i tō mātou nohonga i Hēmi Pānete, ka takiwhiti atu te tira ki Tokopuhi, ki te kite i ngā ana kōhatu i manaaki i te iwi i te wā i a rātou, hei waahi wānanga, hei tāwharaunga, ā, ka tākina anotia ngā kōrero tuku iho e Papa Anaru. He maha noa atu ngā waahi pēnei ki ngā rohe ake o ngā uri, heoi, ko te ātaahua o ēnei tūmomo toronga, e oti ana e ngā uri te whakatairite i tō rātou taiao ki tērā o te waahi kua takahia e ia. I te rā tuatoru o tēnei noho, ka hīkoia te wao o Maungatautari. Ko tētahi o ngā mahi i whakahaerehia e te roopu ruruhau o Maungatautari, ko te whakarongo i ngā oro manu me te ako ki ngā mahi e mahia ana e te roopu ruruhau, mō te tiaki i te pūnaha hauropi o tēnei maunga. Hei whakakapi i ā mātou toronga i te whenua, ka hoki mātou ki Te Waotū, ka heke ki te koawa o Mangaorua ki te ako i ngā tikanga hopu kēwai ki te tau rahurahu. He mahi aro ki ngā tairongo o te tangata me tōna anō hononga ki te taiao. He maha ngā akoranga i ākona e ngā uri i tēnei o ngā wānanga, engari ko tētahi o ngā hua, ko te kite ā-kanohi, te rongo ā-tinana me te rongo hoki i te mauri o te tauira rangatira e kawe ana i ngā tikanga tāukiuki o te “ToA Tiaki Taiao”. Nā Hannah Simmonds - Pou Angitu Ngā Kura ā Iwi o Aotearoa  |
